SEO Step by Step Tutorial for Beginners in Hindi (Overview)

SEO – Sabse mushkil task, Iske liye ek professional SEO hire karna padhta hai, Google itni easily sites ko ranking nahi deta, Bahut mushkil kaam hai SEO seekhna, Bahut time lagta hai…

Blah! Blah! Blah! – hehehe…… Sach toh yeh hai ke yeh sab bahane hain.

SEO Step by Step

Friends, aaj se main Search Engine Optimization – SEO Step by Step Tutorial start kar raha hu, for Beginners. Jinhe seekhne ki khwahish toh hai, but woh bhi yehi maante hain ke SEO bahut mushkil hai, easy nahi hai, mehnat lagti hai etc.,

But friends, trust me, SEO sabse easiest aur interesting kaam hai – agar aap properly ise samajh kar seekhein toh. Warna nahi.

Log maante hain ke yeh mushkil hai, bahut mushkil hai ya namumkin hai. But sab bahane hain. Aisa kuch bhi nahi hai. Agar aap yeh Tutorial Series mann laga kar, samajh kar seekhne ki koshish karoge aur thodi practice (Live) bhi karoge, toh iss poore tutorial ke baad aap agar 100% nahi toh at least 85% toh SEO Expert ban hi jaaoge – Guarantee ke saath.

Maine aksar dekha hai ke SEO topic mein jhoothi aur galat information batayi gayi hai. Ab aap isse Miscommunication, Misinformation ya Misleading Information – kuch bhi naam de sakte hain. Bahut se new SEO Professionals iss information ko maan kar kahin na kahin 5%-7% ka nuksaan paate hain.

SEO ko start karne se pehle, aao hum thoda Google ko samajhne ki koshish karein.

Google banane waale – Larry Page aur Sergei Brin jo ki Stanford University ke students the. Google ki starting stage mein hi unhe samajh aaya ki Links ke zariye hi Internet ka Vishleshan, Chhaan-Been, Ranking ki ja sakti hai. Wahin se "Internet Crawling" ki shuruwaat hui. Aur decide hua ke jin sites ke links sabse zyada hain, theory ke hisaab se woh sites Best Sites hain.

Google ka purpose sirf yehi hai ke at the end sabse Best Result ko sabse pehle show kiya jaaye. Jo bhi aap search bar mein search kare, to sabse top aur best result hi dikhaya jaaye. Aur yeh sab hua upar batayi gayi Theory ke hisaab se:Ke jin sites ke links sabse zyada honge, woh sites sabse Best / Relevant Sites maani jaayengi.

Ab iska matlab itna hai ke humein Google ko yeh batana hai ke humara Page kis baare mein hai. Aur yeh bhi show karna hai ki hum Popular hain. Aur yeh karna ke liye hum kuch easy aur simple steps ka use karenge taaki hum bahut hi easily aur less time mein best results pa sakein.

SEO se aapka kya matlab ?

  • SEO se aap apni Site ko is tarah banate hain ke aapki site ko Search Engine Results mein achchi rank mil sake.
  • SEO se aapki site ko zyada, achcha, sahi aur target waala traffic milta hai.
  • SEO se aap yeh samajh paate hain ke "Search" ka pattern kis tarah kaam karta hai aur log kya aur kis tarah Search ko use karte hain.

Recommended: SEO Kya hai ? Search Engine Optimization Ki Puri Jankari in Hindi

Google ko thoda sa samajhne ke baad, ab thoda detail mein samajhte hain ke SEO kaam kaise karta hai.

Aap jab bhi kuch search karte hain Google, Bing, Yahoo etc. Search Engines par, toh aapko results toh 1 second mein mil jaate hain. But in results ka ek bahut lamba process hota hai. Ek bahut lambi chain ke through hi yeh results ke taur par aapko show hote hain.

1. Crawling – Google ka ek Software jise aap Crawler, Googlebot, Spider ya CrawlRobot kuch bhi bol sakte hain. Yeh Software ek Website ke har ek page ko detail mein dekhta hai, jo bhi pages aapki site pe linked hain, yeh Crawler sabko read karta hai.

2. Indexing – Jo bhi links, pages, aapki website ke links – yeh Crawler read karta hai, collect karta hai, unhe ek Database mein save kar deta hai, jahan se yeh pages / links aasaani se wapis nikale ja sake. In sabhi links / pages ki jo description hai, words aur references hote hain, unke hisaab se Google inhe store karta hai. – In short, in pages ke Keywords ke hisaab se.

3. Process – Jab ek search ka result aata hai toh Google in saved pages / links ko process karta hai. Aap kuch bhi search karte hain, toh google apne Database mein se sabse zyada relevant aur sahi keywords ko leta hai aur aapke aage rakh deta hai – aapki search ke hisaab se.

4. Relevancy Check – Aapke aage 10 Results per page aur 10+ Pages aate hain. Google yeh check karta hai ke kaun kaun se results, links, pages aapke search ke accordingly relevant aur sahi ho sakte hain, aur tab hi aapke aage apne hisaab se arrange kiye hue results ko relevant samajh kar dikhata hai.

Google, Bing, Yahoo etc. sab mahine mein bahut baar apne Relevant Results ki Niyam Pranali ko Update karte hain. Jab bhi aapki site ki ranking mein koi bhi farq aata hai toh woh isi Relevant Results ki Niyam Pranali ke update hone ki wajah se hi aata hai.

Aapki site agar rank paane ke liye tayaar hai – Iske liye sabse pahle aapko Google ko batana hoga ki aapke site hai kis baare mein, kis topic pe.

Aapki site kitni popular hai, kitne time se live hai internet pe, kitne logo ne visit kiya hai aapki site pe, kitna traffic aapki site generate karti hai – Yeh sab Keywords pe hi depend karega.

SEO mein Keyword ki bahut importance hai.

Ab iske liye mera suggestion yeh hai ke hum ek Keyword Search karein but jin Keywrods par sabse less traffic ho, woh keywords apni site ke liye pick karein. Because aapki site bahut zyada competition waale keywords mein top pe toh nahi aaygi.

Main isse thoda detail mein batata hu.

For example, ek keyword / search hai "Top 10 Songs 2018" – jiske 1 Million searches per month hai. But wahin aap note karenge ke "Best songs of all times", "Top songs 2016 – 2018" etc. bhi Searches hain jin par sirf 1000 searches per month hain. So, First Keyword ka competetion hai 1 Million aur Second Keyword ka competetion hai 1000.

Ab aap khud sochiye ke 1 Million logo ke competetion ko jitna aasaan hai ya 1000 logo se ?

Jawaab aap sab jaante hain.

Keywords ko select karte hi aap yeh samajh paayenge ke aapka Traffic lagbhag kitna ho sakta hai jo aapki site pe visit karega. Kyuki inn "Low Competetion" keywords ke zariye aapki site easily 1st ya 2nd page pe aa sakti hai – Easily. Aur aapki site ko visitors bhi bahut Genuine hi milenge, kyuki woh search karke hi aapki site pe aayenge.

Bas, aaj ke liye itna hi. Main is SEO Step-by-Step Tutorial for Beginners in Hindi ke agle part mein thoda sa On-Page, Off-Page, Search Engine Ranks, Tactics aur Methods ko cover karne ki koshish karunga.

Recommended: On Page SEO ki Jankari Hindi Me

Agar aapka koi bhi question ho, suggestion ho, kuch puchna ho, ya kuch bhi, toh please comment box mein comment karein. Main jald se jald reply karne ki koshish karunga.


Authored by Jiten

Jiten is a content writer and lover of all things affiliate marketing, blogging & technology.


Aapko Article Pasand Aaya? Subscribe to Our Feed!

Bookmark the permalink.

Leave a Reply

Your email address will not be published. Required fields are marked *

CommentLuv badge